KLSH zbulon shkelje në Portin e Durrësit, 232 mln lekë dëme dhe 838 mln të ardhura të munguara
Kontrolli i Lartë i Shtetit ka evidentuar problematika serioze në menaxhimin financiar dhe administrativ të Autoritetit Portual Durrës, duke nxjerrë në pah dëme ekonomike dhe të ardhura të konsiderueshme të munguara.
Mangësi në drejtim dhe vendimmarrje
Sipas raportit të auditimit, Këshilli Drejtues i Autoritetit Portual Durrës nuk ka funksionuar në mënyrë të rregullt, ndërsa Këshilli Konsultativ ka qenë jo funksional, duke sjellë mungesë të këshillimit profesional në vendimmarrje. Gjithashtu janë konstatuar shpërblime të dhëna për anëtarët e Këshillit Drejtues pa miratim nga ministri i linjës dhe në kundërshtim me legjislacionin për konfliktin e interesit.
Shkelje në prokurime dhe pagesa të pajustifikuara
Në fushën e prokurimeve publike janë evidentuar kritere të papërshtatshme dhe kontrata të lidhura me operatorë që nuk plotësonin kushtet ligjore. Auditimi ka zbuluar gjithashtu pagesa pa faturë tatimore, tejkalime të vlerave kontraktuale dhe pagesa jashtë afateve.
Vetëm për efekt të konvertimit të gabuar të monedhës janë paguar më tepër rreth 232 milionë e 965 mijë lekë TVSH. Po ashtu janë identifikuar pagesa për parkime në vlerën mbi 1 milion lekë dhe mosaplikim penalitetesh për vonesa në vlerën 55.6 milionë lekë, si dhe shërbime të kryera pa procedura të rregullta dhe dokumentacion justifikues.
Mungesë eficience dhe të ardhura të munguara
Raporti evidenton mungesë ekonomiciteti, eficience dhe efektiviteti në përdorimin e fondeve publike në vlerën 235 milionë lekë dhe mbi 549 mijë euro. Paralelisht, janë konstatuar të ardhura të munguara që arrijnë në rreth 838 milionë lekë.
Probleme në menaxhimin e aseteve
Auditimi ka gjetur mangësi edhe në administrimin e pasurive, ku nuk janë analizuar për shfrytëzim asete me vlerë rreth 497 milionë lekë. Për inventarë të përdorshëm në vlerën mbi 71 milionë lekë nuk janë ndjekur procedurat e asgjësimit, ndërsa disa kontrata rezultojnë të përfunduara në praktikë, por jo formalisht, duke krijuar humbje të mëtejshme të ardhurash. Në fund të periudhës së auditimit, niveli i debitorëve ka arritur në rreth 796 milionë lekë, ku vetëm një pjesë e tyre ndodhet në proces arkëtimi.
Mungesë transparence dhe rrezik abuzimesh
KLSH thekson gjithashtu mungesë transparence në përcaktimin e tarifave të shërbimeve, të cilat nuk janë reflektuar në Librin e Tarifave. Problematika janë konstatuar edhe në sistemin e hyrje-daljeve, që nuk është plotësisht i integruar, si dhe në administrimin manual të listës së debitorëve, çka rrit rrezikun për abuzime.
Gjetjet e auditimit ngrenë shqetësime serioze për mënyrën e menaxhimit të fondeve publike dhe kërkojnë ndërhyrje për përmirësimin e transparencës dhe eficiencës në një nga institucionet më të rëndësishme ekonomike të vendit.
k.jpg)